افغانستان د کرنې او مالدارۍ نړۍوال نندارتون د «له کروندې تر بازاره» تر لیک لاندې، د کرنې، اوبولګولو او مالدارۍ وزیر مو.لو.ي عطاءالله عمر.ي، د ا.سلامي اما.ر.ت د چارواکو، خصوصي سکتور او د بېلابېلو هېوادونو د استازو په ګډون په کابل کې پرانیستل شو.
د کرنې وزیر دغه نندارتون د کرنیزو او مالدارۍ وړتیاوو د پېژندنې، پانګونې د جلب، د کورنیو تولیداتو د بازارموندنې، د نوې ټکنالوژۍ د لېږد او سوداګریزو همکاریو د پراختیا لپاره ارزښتناک ګام او فرصت وباله.
د کرنیزې پرمختیا صندوق عمومي رئیس، انجنیر عبدالغفور غفاري هم د صندوق د کرنیزې سوداګرۍ پراختیا رئیس عزالدین سعید او د اړیکو او بازارموندنې څانګې له مسئولینو په ملتیا په دغه نندارتون کې ګډون وکړ.
دغه نندارتون د سوداګرو او تولیدوونکو ترمنځ د اړیکو د پیاوړتیا، د کورنیو او کرنیزو تولیداتو د ملاتړ، د سوداګریزو او پانګونې فرصتونو د پېژندلو، د کرنیزو او مالدارۍ محصولاتو د نندارې، د نوې ټکنالوژۍ د لېږد، د پوهې د تبادلې او د ملي او نړیوالو بازارونو د پېژندنې په موخه جوړ شوی دی.
د کرنیزې پرمختیا صندوق مشرتابه او چارواکو د نندارتون له بېلابېلو غرفو څخه د لیدنې پر مهال له کروندګرو، تولیدوونکو، سوداګرو او د کرنې د ارزښت زنځیر له نورو فعالانو سره خبرې وکړې او د صندوق د مالي محصولاتو او خدمتونو، په ځانګړي ډول د اسلامي تمویلاتو په اړه یې معلومات وړاندې کړل.
د صندوق مسئولانو همداراز څرګنده کړه چې صندوق چمتو دی، څو د اسلامي تمویلاتو له لارې بزګرانو، تولیدوونکو، سوداګرو او د کرنې د ارزښت زنځیر نورو فعالانو ته د هغوی د اړتیاوو مطابق مناسب او آسانه تمویل برابر کړي او د کرنیزو او اقتصادي فعالیتونو د پراختیا په برخه کې به ورسره همکاري وکړي.
د مسئولانو په وینا، په دغه نندارتون کې د افغانستان ترڅنګ د ازبکستان، روسیې، ایران، ترکیې او هند سوداګرو او شرکتونو هم ګډون کړی دی او په ۵۰۰ غرفو کې د کرنې، مالدارۍ، کرنیزو محصولاتو، کرنیزو ماشینونو، پروسس او بستهبندۍ اړوند محصولات، وسایل او ټکنالوژۍ نندارې ته وړاندې شوي دي چې شپږ ورځې په دوام ولري.