د کرنیزې پرمختیا صندوق او د افغانستان اکسس مؤسسې تر منځ د مضاربې اسلامي تمویل پر بنسټ د همکارۍ تړون د صندوق په مقر کې لاسلیک شو.
تړون د کرنیزې پرمختیا صندوق عمومي رئیس انجنیر عبدالغفور غفاري او د افغانستان اکسس مؤسسې اجرائیوي رئیس سلیم خان لخوا لاسلیک شو، چې د لاسلیک په مراسمو کې د دواړو لورو مشرتابه غړو او مسؤلینو هم ګډون درلود.
د دې تړون له مخې، د کرنیزې پرمختیا صندوق به د ځانګړې پانګې په پام کې نیولو سره د افغانستان اکسس مؤسسې له لارې بزګرانو او کرنیزو تشبثاتو ته مالي آسانتیاوې برابرې کړي.
د کرنیزې پرمختیا صندوق عمومي رئیس د تړون د لاسلیک پر مهال وویل: «د اسلامي تمویل بڼې کولی شي د هېواد کرنیز سکتور ته د ودې نوې لارې پرانیزي او بزګرانو ته د پانګې برابرولو زمینه برابره کړي».
صندوق په دې باور دی، چې د دې همکارۍ په پایله کې به د کرنیزو محصولاتو تولید، بازارموندنه او د بزګرانو عایدات زیات شي او دا به د هېواد کرنیز سکتور د پیاوړی کېدو په لور یو بل اغیزمن ګام وي.